الاجتماعية

 يوميات  طبيب ومرضى في رمضان


 كالعادة أغلب الحالات بعد الإفطار على طول يجوك يشكو من آلام في المعدة واضطرابات في القولون، وأني بديت نفوت في التاريخ المرضي وكل الأسئلة المهمة ونسأله طول .. 

  • ىشنو فطرت اليوم ؟  

– يا دكتور والله ما كثرت راهو “ضروري يقولك ما كلاش هلبا” !!

  • باهي معليشي خلي نقصقصك.. قولي شنو كليت بالتفصيل نبي نعرف ؟

– اول حاجة فطرت على تمر وحليب وشوية حلويات ..

  • – كم تمرة كليت ؟

– سبعة ثمرات مع شوية بسيسة وطاستين حليب وطرفين بكلاوة وشامية

  • ·        – ماشاء الله وشنو ثاني ؟ 

– بعدين خشينا عالثقيل يا دكتور ، شربة وكسكسي وشوية مشقشقات

  • ·        – شن هما المشقشقات ؟

– طريفات بوريك ومبطن وبيتزا وبراك وحاجات ثانية مدايرينهم البنات مانعرفش شنو يقولولهم !

  • ·        – هادو مشقشقات يا ظالم ؟؟  باهي كم كليت منهم طرف هادو ؟؟

– ماهو قلتلك ما كترتش يا دكتور ، طريف ولا طريفين من كل حاجة !!

  • ·        – ياراجل حرام عليك أني تخيلتهم بس وجعتني بطني !

هذا عينة من المرضى/ وطبعاً أني نقعد مستغرب كيف هو مقتنع فعلاً أنه مش مثقل في الأكل ! 

وللأسف معظمنا هكي .. مهما تحاول تفهمه أن معدته صايمة وشبه واقفة 16 ساعة وبعدين يجي يخلعها بالبراك والمبطن والعصبان وجميع أنواع المقليات والمشويات والبهارات، ضروري ما تضطرب وتتلخبط وتنتفخ وتخش بعضها الحكاية .. وبرضو ما يقتنعش !!

يقعد يقولك لا هادي أول مرة تصيرلي ،، وأني من زمان معدتي تتعب في رمضان بس ! ويبدأ يطلع في أعذار أخرى . 

 بالله عليكم يا ناس أرحموا بطونكم شوية ، مش هكي الصيام راهو !

من عيادة الدمتور عادل الحويرسي

اترك تعليقاً

لن يتم نشر عنوان بريدك الإلكتروني.

زر الذهاب إلى الأعلى